MUNAJAAT E SHABANIYA

MUNAJAAT E SHABANIYA

Imam Ali (as):
Mere Maabood! Rehmat naazil farma Muhammad (saww) aur Aal e Muhammad (as) par aur jab main Dua karu’n to meri Dua ko qubool kar le aur jab main pukaru’n to meri awaaz ko sunn le aur jab main munajaat karu’n to meri taraf tawajjoh farma ke main Teri hi taraf bhaag aaya hoo’n aur Tere hi saamne khadaa hoo’n, faqeer hoo’n, miskeen hoo’n, faryaadi hoo’n aur Tere sawaab ka ummeed-waar hoo’n...
(Munajaat e Shabaniya)

Imam Ali (as):
Tu mere dil ka haal jaanta hai, meri haajat se ba-khabar hai, mere zameer ko pehchaanta hai aur Tujh se mera anjaam makhfi (hidden) nahi hai aur jo main kehna chahta hoo’n wo bhi Tujhe maalum hai aur jo bayaan kar raha hoo’n wo bhi Tu jaanta hai aur aaqebat ke liye jis cheez ka ummed-waar hoo’n wo bhi Tere ilm mein hai...
(Munajaat e Shabaniya)

Imam Ali (as):
Mere Maabood! Agar Tu mehroom kar dega to mujhe kaun ataa karega aur agar Tu chhor dega to kaun madad karega? Mere Maabood! Main Tere gazab se aur Teri naraazgi ke naazil hone se Teri hi panaah chahta hoo’n. Maalik! Agar main Teri Rehmat ka ahel (deserving) nahi hoo’n to Tu is baat ka ahel hai ke Apni meherbaani se mujh par karam kare...
(Munajaat e Shabaniya)

Imam Ali (as):
Mere Maabood! Zindagi bhar to Tu ehsaan karta raha hai to ab marne ke baad oos ehsaan ko qat’a (discontinue) na karna. Bhala main marne ke baad Teri nigaah e karam se kaise maayus ho sakta hoo’n jab ke zindagi bhar Tujh se siwaaye nekiyo’n ke kuchh nahi dekha hai...
(Munajaat e Shabaniya)

Imam Ali (as):
Mere Maabood! Mere saath wohi bartaav karna jiska Tu ahel hai aur Apne fazl se oos bande par meherbaani karna jo gunahgaar hai aur jisko jihaalato’n ne dhaa’np liya hai. Maalik! Tu ne duniya mein mere gunaho’n ko chhupaya hai to main Akherat mein unki parda-poshi ka zyada mohtaaj hoo’n. Jab Tu ne Apne nek bando’n par zaahir nahi kiya hai to ab Qayamat ke din manzar e aam par mujhe ruswa na karna...
(Munajaat e Shabaniya)

Imam Ali (as):
Mere Maabood! Meri haajato’n ko paltaana nahi. Meri ummeed ko na-ummeed na karna aur meri aarzuo’n ko qata’ na karna. Agar Tu mujhe zaleel karna chahta to meri rehnumaayi na farmata aur agar Tu meri ruswaayi chahta to meri parda-poshi na karta. Main ye soch bh nahi sakta ke Tu meri oos haajat ko radd kar dega jisko maangne mein saari zindagi guzaari hai...
(Munajaat e Shabaniya)

Imam Ali (as):
Mere Maabood! Agar Tu mujhe jurm par pakdega to main Teri bakshish ka daaman thaam lunga, agar muhje gunaah par pakkdega to main Teri parda-poshi ka sahara lunga. Aur agar Tu mujhe Jahannum mein daalega to main Ahl e Jahannum ko bataunga ke main Tera chahne-wala hoo’n...
(Munajaat e Shabaniya)

Imam Ali (as):
Mere Maabood! Main Teri bargaah se nakaam aur mehroom kis tarah jaa sakta hoo’n jab ke main Teri ataa se ye tawakko rakhta hoo’n ke Tu mujhe Rehmat o Bakshish ke saath paltayega. Khudaya! Main ne gaflato’n ke aalam mein apni zindagi ko guzaar diya hai aur Tujh se doori ke nashe mein apni jawaani ko barbaad kar diya hai...magar beher-haal main Tera banda hoo’n aur Tere bande ka beta hoo’n. Tere saamne khada hoo’n aur Tere hi karam ko waseela banaye huwe hoo’n...
(Munajaat e Shabaniya)

Imam Ali (as):
Mere Maabood! Main wo banda hoo’n jo Teri mohlat se faayda uthha-kar be-hayaai ke zariye Tera saamna karta tha magar ab main har buraai se nikal aaya hoo’n aur Tujh se muaafi ka talab-gaar hoo’n is liye ke muaafi hi Tere karam ki zamanat hai. Khudaya! Mere paas koi aisi taaqat nahi hai jiske zariye main maasiyat (gunaho’n) se nikal aau’n magar oosi waqt jab Tu mujhe Apni mohabbat ke liye bedaar kar de. Jaisa Tu ne chaha, main ho gaya. Ab Tera shukr hai ke Tu ne Apne karam mein daakhil kar liya hai aur mere dil ko gaflat ki kasaafat se paak kar liya hai..
(Munajaat e Shabaniya)

Imam Ali (as):
Mere Allah! Meri taraf wo nazar kar jo Tu pukaarne waale par karta hai, Tu uski Dua qubool karta hai, phir uski yu’n madad karta hai jaise wo Tera farmabardaar tha. Aye Qareeb ke jo na-farmaan se doori ikhtiyaar nahi karta aur aye wo Sakhi jo kisi ummeed-waar ke sawaab mein bukhl (kanjoosi) nahi karta.
(Munajaat e Shabaniya)

Imam Ali (as):
Mere Allah! Mujhe wo dil de de jisme Teri nazeeki ka shauq ho aur wo zabaan de de jiski sachchai Teri bargaah tak pahu’ncha de, wo nigaah de de jo Tujh se qareeb-tar bana de. Mere Allah! Jo Tere zariye maaroof hota hai wo maj’hool (gumnaam) nahi hota aur jo Teri panaah le leta hai wo lawaaris nahi hota hai, jiski taraf Tu mutawajjeh ho jaaye  wo ranjida nahi hota...
(Munajaat e Shabaniya)

Imam Ali (as):
Mere Allah! Jo Tere sahaare chale usay raushni mil jaati hai aur jo Teri panaah le le usay panaah mil jaati hai. Ab main Teri panaah mein aaya hoo’n lihaza Apni Rehmat se na-ummeed na karna...
(Munajaat e Shabaniya)

Imam Ali (as):
Mere Allah! Mujhe musalsal Apne zikr ka shauq inaayat farma aur mujhe Apne Asma e Husna se masroor hone aur Apne pakiza muqaam se dili sukoon haasil karne ki himmat de. Mere Allah! Tujhe Teri zaat ka waasta hai ke mujhe Apne farmabardaar bando’n mein shaamil kar le aur Apni khushnudi ke muqaam tak pahu’ncha de kyun ke main na apna bachaav kar sakta hoo’n aur na apne aap ko kuchh faayda pahu’ncha sakta hoo’n...
(Munajaat e Shabaniya)

Imam Ali (as):
Mere Allah! Main Tera ek kamzor aur gunahgaar banda hoo’n aur Tujh se muaafi ka talab-gaar gulaam hoo’n. Pus, mujhe oon logo’n mein na rakh jinse Tu ne tawajjoh hataa li aur jinki bhool ne unhe Tere afw se gaafil rakha hai...
(Munajaat e Shabaniya)

Imam Ali (as):
Mere Allah! Main bus Tujh se sawaal karta hoo’n, Tere aage aah o zaari karta hoo’n, Tere paas aaya hoo’n aur Tujh se sawaal karta hoo’n ke Rehmat naazil farma sarkaar Muhammad (saww) aur Aal e Muhammad (as) par aur ye ke mujhe aisa qaraar de jo hamesha Tera zikr karta raha, jisne Teri na-farmaani nahi ki, jo Tera shukr adaa karne se gaafil nahi huwa aur jisne Tere farmaan ko subook (halka) nahi samjha...
(Munajaat e Shabaniya)